Unki jhurraye haath achanak hi pani k gilaas ki oar badh gaye. Kapkapate hathon se paani k do ghoonth bhar k chacha dheere se bole, "Har saal aatey the yeh saale! Bus bhar bhar ke aatey the aur charon oar naaron ki aawazein goonj uthti thi. Mano vanar sena lanka dehen karne aayi hai. Pehle ke kuchh saal to humne dabaye rakha, hamari tadaat zada thi, par unka josh humse kahin badh chadhkar tha. Hum khud me hi teen hisse karke bane hue the, wo 50 ho ya 500 sab ek sath hote the. Kitni hi galian hui, kitni ladaiyan hui, par saale kabhi toote nahi".
Chacha kamar seedhi kar ke baith gaye. Unki aakhon me gussa bhi tha aur kahin na kahin ab darr sa dikh raha tha. "Darr lagta tha jab naye the tab, par seniors ke saath hum bhi sher hote the. Kaise koi itni duur se aake, hamare campus me ghus ke, hamein hi thappad maar k nikal jata tha, pata nahi. Tareeke hazar the, aur humne use bhi kiye, par ye to sale angad ke pair ki tarah ade hi rahe!"
"Fir wo din aya jiska humein dar tha. Uss din humne apni haar maan li thi. Wo amooman 30-35 honge, aur hum 150. Fir bhi bhaari pad rahe the! Unke naron ki aawaz kaan chhed ke dil dehla rahi thi... Humse aur 'YO GN!!' nahi suna ja rha tha. Anayas hi hum bhi foot pade. 'YO PALDI' ki aawaz humne bhi lehra di. Fir bhi saalo ne peechha nahi chhoda. Us din hamein pata laga ke ek hone ka matlab kya hota hai."
"Poster wars to ek tareeka tha. Salon ki beizzati ka badla unhone ek raat me le lia. Hum sath hote hue bhi alag lag rahe the. Aur wo hum pe haste hue, 'YO GN' ke naare lagate hue, usi hari bus mein baith ke chale gaye."
0 comments:
Post a Comment